森の浪人去旅行 #4

森の浪人去旅行 #4

前言：希望已經睇緊故事嘅朋友多多留言，以及follow。唔該，想聽大家嘅意見。唔該。

雖然有得再見到Chiara，不過聽落好似有啲事咁。

我喺門口等咗一陣，一位意大利女士就向我嘅方向行過嚟。呢位女士雖然無扎到馬尾，我都認得返佢就係Chiara，因為佢已經換返今日我見到佢嘅時候嘅衣著。

本來可以再見到Chiara係開心嘅，但跟住佢一齊出嚟嘅竟然係一位男士。

第一眼，我以為佢係Chiara男朋友或者老公之類，出嚟打個招呼，再唔係就繼續想因為行李嘅事出嚟多謝下我。我就覺得唔洗喇，唔想見到你有男人啊。不過，佢哋畀我啲感覺唔係咁，最多只係同事。

Chiara：多謝你有影到我啊。

我：唔多謝啦，咁靚嘅衫，係人都想影低。

我唔知自己講緊乜。

Chiara又講：你影得好好啊。我想問，可唔可以用張相畀我呢位同事做啲嘢啊？

果然，佢哋只係同事。至於「做啲嘢」？睇嚟係想用我張相做啲可能係宣傳之類？唔會掛，我張相邊有咁巴閉啊。對我嚟講，呢張相其實影得好差，如果佢地有用，我當然都無咩所為。

正當我打算開口答應嘅時候，呢位男士睇嚟有啲心急，驚我唔肯答應，於是搶先開口，伸手同我握手：我叫Mario。

我都禮貌回佢： 我叫Mori。

唉，呢個時候我先發現，我都未同Chiara介紹過自己。之前實在以為大家只係朋友都不如嘅關係，都無諗過會需要介紹自己。

Mario又講：我哋會有報酬畀返你嘅。

Mario隨即攞出一張餐廳劵，講：呢間係呢度有名嘅餐廳，菜式比較地道，無咩遊客會去嘅，環境同食物都相當好，我哋fashion show嘅設計師都會去，或者Chiara之後可以再介紹下。咁如果你答應畀我哋用你張相嘅話，不如就勉強收咗我哋小小心意，等Chiara同你都可以去食個晚飯，休息下啦。

同Chiara食個晚飯？咁大個offer？我即刻想答應。

點知Chiara呢個時候好嬲咁插嘴：你唔好答應佢住啊！

Chiara搶咗Mario嘅餐廳劵嚟睇，又話：呢間嘅話都算你有誠意。

又問我： 你有無時間食飯先？

其實就算無，我呢個時候都會答：有啊。

Chiara：咁你feel good 嘅話就答應佢啦。

Mario見到Chiara嘅講法，擺明畀面色佢睇，特登要為難下佢。

我：其實都唔錯啊，咁好啦，多謝你嘅offer。

我仲以為Chiara轉身就會要咗張餐廳劵，點知Chiara對男士講：佢答應你喎，我未答應喎！

Mario見攪掂咗我呢個外人，有啲忍唔住要對返Chiara呢位同事發火。

Chiara繼續講：我本來約咗Greta食飯㗎喎，而家咁，你要我飛起Greta啊？Greta唔洗食啊？

Mario怕咗Chiara，於是急急攞出第二張餐廳劵，又話：OK, OK, 我畀多張你哋，請埋Greta食，ok ? 

Chiara搶咗餐廳劵：咁就差唔多。

然後，就同我講：我哋走。

我當然跟住行，不過...其實我唔知邊個係Greta，乜唔係淨係同Chiara食咩？定係我畀佢哋玩咗？

Chiara行咗兩步，就打咗個電話，應該係打畀朋友Greta，同佢講要轉去食嗰間餐廳，直接喺嗰度等。

之後，Chiara就同我解釋返：啱啱個Mario，本來佢應該要有自己影嘅相攞去同公司交差㗎，不過條友漏咗蕉，好彩有你張相，叫做救咗佢一命囉。真係唔該晒你啊。

我開始明白事件，話：其實現場都有好多攝影師，我諗一定會有更好嘅相。

Chiara：相就一定有嘅，不過佢係唔可以問其他攝影師借相㗎。

我：哦？

Chiara：一來咁做等於話畀人知佢漏蕉，大家係同行，救佢嘅人一定有，但係只會畀人覺得佢唔夠專業。二來，咁要出人哋攝影師個名，咁嘅話，佢損失嘅就會唔只係兩張餐廳劵。

我：咁我明喇。

Chiara又話：其實你幫咗佢，都間接幫咗我，我哋公司揸呢啲嘢揸得好緊，而家起碼個責任只會喺佢度，唔關我事。

聽到Chiara咁講，我都開心啲。

Chiara轉個話題：原來你叫Mori。

我：係啊，nice to meet you.

Chiara：nice to meet you too, I am Chiara.

我哋握手，我重覆，我哋握手，我再一次掂到Chiara。

Chiara嘆咗口氣，又講：畀你一日救咗我兩次添。

對我嚟講，兩次所為救咗Chiara都只係意外。不過，咁樣嘅話，應該點都可以話同Chiara係朋友掛。

我哋企喺餐廳門口，等咗一陣，一位女士向我哋走過嚟，相信佢就係Greta喇。