森の浪人去旅行 #2

森の浪人去旅行 #2

前言：成個故事已經寫好，希望大家多支持，更加希望加強版可以面世。睇完，留個言，鍾意、唔鍾意都得。

雖然有啲晏，但仲趕得切去嚟個快嘅聖母百花大教堂遊覽。

我當然唔係咩宗教或者宗教藝術嘅專家，但係喺香港長大嘅我，多少對歐洲嘅宗教有啲認識，加上歐洲嘅宗教藝術從來都畀到藝術家唔少啟發，短短一遊，已經令我覺得獲益良多。

就喺啱啱行出聖母百花大教堂嘅時候，我嘅手機就傳嚟Chiara嘅WhatsApp message。佢果然send 咗e-ticket過嚟，仲send埋google map 嘅場地位置，最重要嘅係，佢仲send 咗一個 Hi 畀我。

我：Thank you, 啱啱參觀完聖母百花大教堂。

Chiara：Good ! Enjoy ! 場地唔喺嗰面，你坐輕鐵啦，幾個站就到。

其實好想即刻再約Chiara出嚟，不過又好似好唐突。就算我叫做有恩於佢，都唔等於大家真係咁熟。轉頭喺會場見到佢嘅話可能都只係打個招呼，話晒佢其實係喺度做緊嘢嘅，我又唔係咩時裝界嘅人，點都唔方便黐到咁埋。我諗，陣間都係當觀摩下fashion show 就算好喇。算啦，一面之緣，唔好諗太多。

Google map都建議我搭輕鐵去，但係由呢個位沿路行返去輕鐵站好似有啲遠，睇下有無邊條小路可以行得快啲先。

搵咗一陣，果然有條小路可以慳啲時間。

我跟住Google map嘅指示行，相信唔洗二十分鐘就到。

呢個時候，一個黑影突然向我撲過嚟，我第一個反應以為係有人要搶我嘢，點知個黑影唔單止唔係搶嘢，仲夾住咗我隻右手手臂。

呢個夾住我手臂嘅人夾住我行咗幾步，就開口同我講嘢，原來係一位意大利女士。

女士：我畀人跟，請你幫我一下，快啲離開呢度。

同今朝喺火車遇到Chiara嘅時候一樣，我第一個反應都係警剔呢個係有計劃嘅偷嘢把戲。佢貼都咁，可能已經可以偷到褲袋、衫袋嘅嘢。

呢個距離，我只可以留意到佢係一位短髮嘅女士。除此之外，我根本睇唔清楚佢個樣，唯有極力搵下佢嘅其他特徵，恐防之後有啲咩事，我都可以有個線索。

如果如佢所講，佢係畀人跟，咁即係佢想同我假扮識得...唔係，呢個女士嘅身體實質上已經緊貼住我嘅手臂，佢應該係要同我扮係情侶，嚇走跟佢嘅人。的確，只有情侶先會以咁嘅方式貼住喺街上面行 。

由我而家嘅角度望向呢位女士，我留意到佢嘅前臂有啲好似紅斑、紅點喺度。

我當然唔知係咩，只知一般人未必會有咁嘅紅點喺手。如果真係要我勉強咁形容，呢啲紅點就好似係有食物敏感嘅人，食咗啲會敏感嘅嘢，然後身上出嘅紅點一樣。雖然唔算多，但以我而家嘅超近距離嚟睇，絕對可以睇得到。

佢好緊咁用手同身體夾住我嘅右手臂一直向前走，啱啱好係我本來要去搭輕鐵嘅方向。根據Google map，呢段路本來要行十幾分鐘，而家兩分鐘就差唔多行完。

佢遠遠咁見到啱啱有輕鐵埋站，於是再加快速度，順勢夾埋我上車。

雖然我仲未攪清楚佢發生咩事，但呢個夾埋我一齊上車嘅舉動，令我覺得佢唔似係想乘機偷我嘢，而係真係畀人跟而有危險。

上咗車之後，女士終於放開我，仲回身向窗外觀察跟蹤佢嘅人。

呢個時候，我先可以睇清楚佢嘅外表，原來都係一個幾靚嘅女仔，有啲《天使愛美麗》入面柯德利塔圖或者《后翼棄兵》嘅Anya Taylor-Joy嘅感覺。【故事受歡迎嘅話，遲啲畫畀大家睇。】

佢嘅短髮略帶啡紅色，原來仲戴住一對大圓形金屬耳環，耳環由短髮底部露出。一條暗綠色嘅短裙，露出兩肩同埋鎖骨嘅位置，兩條細長嘅小腿，腳上著住一對輕型嘅小拖鞋，十隻可愛嘅小腳趾都可以看得到。手上攞住一個深啡色嘅手袋。

佢可能見情況已經算係安全，就轉身對住我抖咗啖氣，然後多謝我同佢合作。

女士：真係多謝你。

我唔係好知點回佢：...

女士又講：我成日畀人跟蹤，好彩見到你咋。

我：其實我只係遊客...

女士：我知啊，就係遊客先好。佢哋唔敢亂嚟，本地人可能會嚇唔走佢哋。

對於佢嘅呢種講法，我仲需要啲時間思考一下，到底係咪真係咁㗎呢？

女士：我叫Tania。

我：Tania...

我默唸咗佢嘅名一次，既然係咁，我都打算介紹一下自己。

我：我叫 ...

點知我都未講自己叫咩名，Tania就向我撲上嚟，㩒住咗我嘅膊頭，然後𡃶咗我右邊塊面一啖，再喺耳邊講咗句多謝。

由今朝Chiara嘅一下面部緊貼，到而家畀Tania直接𡃶咗一下，我成個人已經麻木咗。

本來以為都仲需要向佢介紹下自己，點知佢鬆開我之後，就轉身落咗車。

我嚟唔切反應，留咗喺車廂，只好目送Tania 離開。

後記：一直講想寫得普及一啲，不過，都只係第二集，就好似有啲忍唔到手咁會寫過界。所謂「加強版」會點樣加強？相信男人都會估到。希望大家多支持，睇完，留個言。