森の浪人去旅行 #3

森の浪人去旅行 #3

前言：希望已經睇緊故事嘅朋友多多留言，以及follow。唔該，想聽大家嘅意見。唔該。

我畀Tania𡃶咗一啖，回神過嚟嘅時候輕鐵已經開咗車。

雖然我本來就係諗住要搭輕鐵嘅，但係其實我仲未攪清楚自己要搭邊條線、邊個方向、去邊個站、搭幾耐，突然間畀Tania夾咗上車，完全唔知自己而家到底去緊邊。

我即刻check下手機，於是又過咗一個站。

到我可以確定到自己嘅位置，同埋要點樣先可以去到Chiara嘅fashion show會場嘅時候，我先發現原來我根本就係要喺Tania 落車嗰個站落車就可以去到fashion show會場。

咁即係話，早知頭先同Tania一齊落埋車啦，如果係咁或者可以同Tania仲有少少下文。

不過我又諗，就同Chiara一樣，大家其實唔係咁熟，都係自己諗多咗。去旅行有時就係有好多呢啲Fantasy出現，真係要小心啲先得。事實係，只係我去緊旅行，對於Chiara同Tania嚟講，今日都只係平日。我做多咗，只會柒出宇宙。

我落咗車，去返對面月台搭返回頭車返去。返到去Tania落車嗰個站嘅時候，當然已經唔見Tania，唯有繼續摸去fashion show會場嘅路。

會場嘅路其實唔算難搵，只係路程比較遠，行咗二十分鐘就喺一幢古建築外場見到fashion show 嘅banner，再行過兩步就已經係入口。

E-ticket 果然令我可以直入會場。

入到會場，燈光較暗，最光亮嘅燈都只係為咗照住會場中間仍然空洞嘅Fashion show天橋。呢種場景，就算無嚟過fashion show現場嘅人，相信都可以喺電視或者其他媒體上面見過，一啲都唔陌生。

當然，現場人士走來走去，又交頭接耳，令人想像一陣嘅fashion show 開始之後，場面一定好壯觀。

我一個Fashion嘅門外漢入到嚟會場，一個人都唔識，實在係有啲尷尬。我極力嘗識搵下見唔見Chiara，不過都無發現。有好幾次見到幾個女士，差啲誤會咗係佢。無錯，其實我見Chiara嘅時間都唔係咁耐，腦海淨係記住佢馬尾嘅髮型，以及極吸引嘅身材，當然仲有佢緊貼我膊頭嘅一下，但喺眼前微弱嘅燈光之下，會場大量意大利女士，實在令我認唔到邊個先係Chiara，我甚至認為我已經唔記得佢係咩樣。再加上頭先又畀Tania，呢個另一位靚女洗咗我嘅記憶，我諗我都係必需要放棄喺度可以認出Chiara嘅諗法。

真係希望反而係Chiara認得我嚟先叫我，不過一直去到大會宣布fashion show即將要開始，我都只係自己一個企喺度，無人嚟叫過我。

現場各位開始就座準備。

喺無任何前奏之下，一位主持人步出天橋，歡迎咗大家嘅出席又多謝各贊助等等嘅客套話之後，突如其來幾十秒嘅幻燈效果，表示Fashion show正式開始。

配合住背景音樂，模特兒開始逐一由後台走到天橋嘅末端。雖然話我係首次現場欣賞fashion show，但事實係fashion show嘅格式同喺電視、YouTube見到嘅實在無咩大分別，其實唔敢講話非常有驚喜。

我再次強調，我係Fashion 嘅門外漢，所以好自然，我嘅注意力都集中咗喺模特兒身上。

我嘗試認出邊個係Chiara，但就好似我頭先咁講，我已經唔係咁記得Chiara個樣。事實上，喺天橋上面每個Model嘅身材都差唔多，除咗有一兩個膚色較深而容易認出嚟之外，其餘個個都打扮十足。出入後台幾次之後，我根本認唔到佢哋邊個打邊個，甚至係咪已經出過嚟。

就算Chiara有一條長馬尾，我相信都只係佢平時嘅打扮，入到後台，分分鐘已經變咗另一個樣。

我突然諗起讀中小學嘅時候，一班入面總會搵到一個最靚嘅女同學，原因係喺十幾二十個女同學入面，外表一定參差，而雄性嘅藝術觸感，好自然就會對雌性產生一個ranking，要確認邊個最靚就變得好容易。

當然，確認最樣衰嘅都係一樣咁易。

不過當你對住一班經過訓練、殷選、打扮嘅雌性面前，呢種雄性嘅自然藝術觸感就會出現錯亂。我可以好理性咁講，就算Chiara唔係呢班model入面最正嗰個我都會相信。

講咗咁多，結論其實就係我根本認唔到Chiara出嚟，而只係喺度齋睇女。

雖然頭先話fashion show格式基本上同喺電視、YouTube見到嘅無咩大分別，但置身現場，其實就只有單一角度。又因為遊客心作祟，於是就舉機開始影相、拍片。不過，身邊嘅攝影師用嘅係專業非常嘅器材，而我就好突兀咁攞出咗部手機出嚟拍攝。

由於我嘅位置唔係咁近天橋，所以根本拍唔到嘅咩。又咁講，我之所以會影相、拍片，其實都只係心癮。我心知呢啲相同片，肯定過一兩日都一定會delete，因為根本唔存在任何意義。

大約一個鐘，Fashion show就完結喇。人群開始散，我又開始變返自己一個。我就掙扎緊要唔要搵Chiara，或者至少send 佢一個 message say個 bye.

點知竟然係Chiara先send message 畀我。咁就好喇，起碼佢記得我。

Chiara：你有無到會場啊？

我：有啊。

Chiara：咁你走咗未？

佢咁問，令我即刻有可以再見到佢嘅幻想，雖然我已經唔記得佢咩樣。

我：未啊。

Chiara；咁你有無影相或者拍片？

我：有啊。

我本來仲想加一句「Fashion show好精彩」之類嘅說話，表示一下自己有專心欣賞，但估唔到Chiara竟然搶先追問。

Chiara：咁你有無影到我著嗰件紅色裝？

我聽到佢咁問，我就諗今次弊喇，相我就影咗好多，咩色嘅衫可能都影咗啲，但要問我邊件係佢著㗎呢，我就真係唔知，唔通要同佢講我認唔到佢？

不過我又諗，佢可能好鍾意嗰件衫，所以先咁問，表示有注意佢應該就ok，於是我唯有答：有啊。

我仲以為可以攪掂，點知Chiara又講：麻煩你send 嗰張相畀我。

呢次真係堅死喇，我都認唔到佢，點知send 邊張畀佢先啱。

我姑且拖延一下咁回佢：畀啲時間我搵下。

好彩Chiara自動畀多個提示我：好啊，膊頭有粒花嘅嗰件啊。

我就即刻睇返啲相，發現原來紅色為主加膊頭有粒花嘅都有幾張，有大花又有細花，有多花又有少花，又有真係明顯有朵花嘅，又有花pattern嘅，不過明顯係唔同model著。可惜嘅係，篩走咗兩張之後，我都係唔知淨返呢七張入面邊個係佢，仲有嘅係，有兩張相其實影得好差，根本睇唔清楚個樣。

唉，不過都無辨法，我將呢堆膊頭有花嘅send 晒畀Chiara，再加一句話：呢堆衫都好靚。

當然，我擔心嘅係我send畀佢嘅相入面根本無一個係佢。

無幾耐，Chiara喺其中一張相度畀咗個like，我就諗，唔通呢個係佢？

一睇之下，身材確實似係佢，五器亦相當吸引人，不過髮型、化妝都完全唔係嗰回事。

Chiara又話：你有無時間？等等我，有事要搵你幫忙。

我自然回答： 有啊，好啊，我喺門口。